Ака уйăхĕн 20 - 25- мĕшĕсенче Йÿçкассинчи пĕтĕмĕшле пĕлÿ паракан вăтам шкулта  чăваш чĕлхи эрни иртрĕ.

     Кĕçĕн класс ертÿçисем  ака уйăхĕн 20- мĕшĕнче  чăваш халăхĕн мухтавлă ывăлне -  И. Я. Яковлева халалланă класс сехечĕсем ирттерчĕç.

     Ака уйăхĕн 21- мĕшĕ 1 – 4 класс ачисемшĕн уйрăмах пăлхануллă кун пулчĕ: хăйсем тăван чĕлхене, тăван литературăна еплерех пĕлнине, хакланине, тавра пĕлĕвĕ мĕнла шайра пулнине тăватă станци мелĕпе йĕркеленĕ вăйăра кăтартса пама тиврĕ вĕсен ( «Тăван чĕлхе», «Литература», «Ытарлă сăмахлăх», «Тавра пĕлÿ» станцисем). «Тăван чĕлхе» станцире 2-мĕш класс ачисем пуринчен те нумайрах балл пухма пултарчĕç, тăван литературăна ыттисенчен ытларах каллех 2-мĕшсем пĕлни сисĕнчĕ. Хальхи чăваш пепкисем темшĕн ытларах вырăсла сăмахланăран, «Ытарлă сăмахлăх» станцире çăмăлах пулмарĕ ачасене. Апла пулин те, 4- мĕшсем панă ĕçсемпе ыйтусене ăнăçлă татса пачĕç, 1-мĕш вырăн йышăнчĕç. «Тавра пĕлÿ» станцире чи маттуррисен ятне 1-мĕш класс ачисем тивĕçлĕ пулчĕç.

    Эрне кун, ака уйăхĕн 22- мĕшĕнче  илемлĕ вулав конкурсĕ иртрĕ. Виçĕ номинаципе тупăшрĕç  кĕçĕн классенчи тăван сăмахлăха килĕштерекенсем: сăвă калакансем, юмах- халап юратакансем, авторла хайлавсене кăмăллакансем. Сăвва илемлĕ, чуна тыткăна илмелле калаканни 2-мĕш класра вĕренекен Валерия Сурикова пулчĕ (1-мĕш вырăн). Юмах- халап калакансем хушшинче 2-мĕш класри София Максимова мала тухма пултарчĕ. Виççĕмĕш номинацире Николай Ишентей писателĕн «Çенĕкри кĕрешÿ» калавĕпе куракансене тыткăнланă Софья Иванова (3- мĕш класс) çĕнтерчĕ.

    Ака уйăхĕн 22- мĕшĕнче  акт залĕнче пуçтарăнса пĕтĕмлетÿ турăмăр, классенче хатĕрленĕ илемлĕ ташă- юрăпа килентĕмĕр.

    Çак шухăшпа саланчĕç ачасем уявран :

    Кунран кун – хаклăрах,

    Кунран кун – аслăрах!

    Пурнар, чĕлхем,

    Тăван чĕлхем, пурнар!

#ЗахаровМинобразования21 #ДмитрийЗахаровМинобрЧР #ДмитрийЗахаровЧувашия #МинобразованияЧувашии